KESS PSDA Gwobr Datblygu Sgiliau Ôl-radd

Diben KESS yw paratoi a hyfforddi unigolion i gyfrannu at ymchwil fel gweithwyr proffesiynol. Rydym hefyd yn ceisio hybu sgiliau lefel Uwch ymysg sectorau blaenoriaeth Llywodraeth Cymru ar gyfer ymchwil a datblygu. Felly, mae elfen o ddatblygu sgiliau’n rhan o bob ysgoloriaeth KESS. Mae’r wobr hon, a gefnogir gan gyllideb flynyddol ar gyfer datblygu sgiliau, wedi bod yn agwedd lwyddiannus iawn ar y prosiect KESS yn ei gyfanrwydd.

Mae cyfranogwyr KESS yn cael y dasg o gwblhau nifer o ‘gredydau KESS’ sy’n cyfrif tuag at y PSDA drwy gwblhau cyfanswm nifer o oriau hyfforddiant y cytunwyd arno. Ein targed cychwynnol i’r ysgolorion PhD yw 60 o ‘gredydau KESS’, ond rydym yn falch o weld bod y rhan fwyaf o ysgolorion yn cwblhau, mewn gwirionedd, tair gwaith cymaint â hynny erbyn iddynt gwblhau’r cwrs.

Llwybr Nodweddiadol

Gellir casglu ‘credydau KESS’ drwy gwblhau amrywiaeth eang o weithgareddau hyfforddiant a datblygu sy’n briodol i’r unigolyn a’i gyfnod astudio. Gallai llwybr nodweddiadol drwy’r broses edrych yn debyg i hyn:

Cyfnod Cynnar

Sgiliau ymchwil
Methodolegau penodol
Adnewyddu neu ymestyn sgiliau

Cyfnod Canol

Ysgol graddedigion KeSS
Technegau dadansoddi data
Technegau cyflwyno

Cyfnod Hwyr

Ysgrifennu ar gyfer cyhoeddiad
Cyflwyno mewn cynhadledd
Gweithdai gyrfaoedd

Mae amrywiaeth enfawr o gyfleoedd hyfforddi a datblygu ar gynnig, ac mae goruchwylwyr academaidd a chwmnïau partner yn cynnig cyngor a chyfarwyddyd ynglyn â sut i flaenoriaethu’r rhain er mwyn cwblhau’r prosiect yn well.

Llwybr enghreifftiol manwl drwy PSDA KESS

Yn ddelfrydol, mae’r Ysgol Graddedigion KESS yn dod ar ddiwedd y cyfnod cynnar a dechrau’r cyfnod canol ac mae’n cynnig cyfle i gyfranogwyr KESS i gydweithio ag eraill y tu allan i’w hamgylchedd ymchwil. Mae’r gwaith ‘adeiladu cohort’ hwn wedi cael ei werthfawrogi’n fawr ac mae’n fuddiol iawn. Rydym yn cymryd y cyfle i edrych ar ryngweithio ag amryw o randdeiliaid a sut i reoli’r senario hwnnw. Mae Ysgol Graddedigion KESS yn edrych ar ochr fusnes y prosiect ac mae hefyd yn cynnwys yr hyfforddiant Datblygu Cynaliadwy, er mwyn i hynny fod yn thema gyson drwy’r prosiect i gyd.

Digwyddiadau preswyl yw Ysgolion Graddedigion KESS ac fe’u cynhelir mewn lleoliadau yng Ngogledd, Canolbarth a De Cymru drwy gydol y flwyddyn. Mae cohortau Ysgol Graddedigion KESS yn tueddu i gadw mewn cysylltiad â’i gilydd gan weithredu fel math anffurfiol o rwydweithiau cymorth, adolygwyr cydweithwyr a ffrindiau. Yn aml, byddwn yn gweld y grwpiau hyn yn ailffurfio o gwmpas bwrdd (ac mewn ffotograffau) mewn digwyddiadau KESS!

Rydym hefyd yn cynnig y cyfle i gymryd rhan yn Ysgol Graddedigion ryngwladol KESS yn flynyddol fel rhan o’n rhwydwaith Ysgol Ddoethurol Ddiwydiannol Ewropeaidd.